CEDE Aruba

CEDE Aruba

CEDE Aruba ta cera convenio cu Gobierno di Aruba y Samenwerkende Fondsen Cariben

Diarason 4 di juli CEDE Aruba, Samenwerkende Fondsen Cariben pa e parti Caribense den Reino y Gobierno di Aruba a cera un convenio cu otro. Cu esaki, un cooperacion a keda confirma cu ta facilita sosten na iniciativanan nobo, realiza pa fundacion y ngo-nan, dirigi riba fortalece bienestar di e habitantenan riba tereno social.

CEDE Aruba y e Samenwerkende Fondsen Cariben ta aporta anualmente un averahe di 2.8 miyon florin na proyectonan comunitario riba e isla. Ta trata aki por ehempel di iniciativanan pa gruponan meta vulnerabel manera nos grandinan, mamanan teenager, hobennan, hendenan den pobresa y esnan cu un adiccion. E convenio ta regula e contribucion financiero na Gobierno y Samenwerkende Fondsen Cariben pa cu iniciativanan mediante CEDE Aruba. E ta encera tambe e responsabilidadnan di CEDE Aruba, manera excelente gobernacion, un bon administracion financiero y un posicion independiente pa loke ta trata politica, religion y comercio. 

E convenio ta balido pa un periodo di cinco aña. E convenio a keda firma pa e miembronan di directiva di CEDE Aruba, Gobierno di Aruba representa pa Sr. Glenbert Croes, Minister di Asuntonan Social y Labor, Sra. mr. Evelyne Wever-Croes, Minister interino di Finansa, Economia y Cultura y e Samenwerkende Fondsen Cariben representa pa Sra. Drs. Henriette Hulsebosch y Sr. Drs. Peter Douwes.